A compdar dera conquèsta arabo-berbèra der an 711 era peninsula Iberica hè partida deth califat omeia de Damasc. Nèish ua naua societat enes confinhs der islam, frut deth mestissatge de cultures fòrça diuèrses: Al Andalós. Eth 929, Abderraman III s’independize deth poder des califes abbassides, que dominauen de Bagdad estant, e proclame Còrdoa coma era capitau d’un nau califat.

Al Andalós ven era prumèra poténcia culturau e economica d’Occident e exercís ua influéncia fòrça importanta enes reiaumes crestians deth nòrd. Era peada der islam deven determinanta ena configuracion dera futura Catalonha: pendent mès de quate sègles, es territòris deth sud deth Lhobregat s’intègren pleament en espaci culturau e politic andalosin.

Era formacion der Empèri carolin indique eth passatge dera antiquitat tardiua ena Euròpa medievau. Ara empara des Pirenèus e enes pòrtes deth mon islamic, era futura Catalonha inície eth sòn bastiment. Era dominacion franca organize es territòris fronterèrs en districtes comdaus, que protegissen era nomentada Marca Ispanica. Damb eth pas deth temps, totun, eth poder des francs sus aguesti territòris s'afeblís.

Es joenes dinasties comdaus, gessudes de linhatges autoctòns, manquen soent as ligams de vassalhatge. Guifré eth Pelut, comde de Cerdanha e Urgelh, amasse jos eth sòn govèrn es comdats de Girona, Barcelona e Ausona, en tot formar atau eth patrimòni basic dera casa de Barcelona. Entàs darrèrs deth sègle X, es ligams damb eth poder franc se trinquen definitivament e s’inície eth camin de cap ara independéncia politica.

En sègle VIII es Pirenèus se tròben densament pobladi a causa des corrents migratòris provocadi pes crisis deth Baish Empèri, es invasions germaniques e era conquèsta musulmana. Quan es vals pirenenques artenhen eth tet demografic, s’inície ua fòrta emigracion de cap as tèrres baishes.

Eth trabalh des familhes pageses que s’installen en zònes despoblades convertís era tèrra gèrma en productiva. Aguest procès ei fondamentau entà compréner era conquèsta e colonizacion dera Catalonha Vielha. Damb eth pas des ans, totun, eth feudalisme s’impause pertot deth territòri e era petita proprietat pagesa liura se ve redusida deuant des domenis deth clergat e des grani senhors feudaus.

Era conquèsta carolina des territòris catalans e eth plaçament dera nomentada Marca Ispanica, origine era formacion d’ua aristocracia singulara, arraïtzada en territòri, mès qu'en fòrça casi a interèssi opausadi ath conjunt dera poblacion. Aguesta classa sociau ges dera fusion entre linhatges d’origina pirenenca e membres dera noblesa ispano-gòta.

Es membres der estament dominant an ena guèrra era sua principau activitat, encara que tanben exercissen foncions administratives e judiciàries enes districtes que possedissen en nòm deth comde. Ei d’aguesti dominis d’a on extrèn es sues rendes. En sègle XI, vien es grani beneficiaris des cambiaments sociaus e der establiment deth feudalisme.

Era Glèisa amie a tèrme un intens prètzhèt d’evangelizacion pendent es sègles VIII, IX e X. Es comunitats agràries tròben ena parròquia eth sòn encastre naturau de relacion. Es monastèris vien centres de conservacion e transmission dera cultura e dera coneishença der antiquitat, e desvolòpen er art romanic, que s’esten pertot deth territòri.

Era Glèisa a un ròtle determinant ena mantenença dera legalitat e der orde. Entà defener-se dera violéncia feudau, era ierarquia eclesiastica cree airines legaus coma era institucion dera Patz e Trèva de Diu, qu'establís era supression des lutes feudaus pendent un periòde de trèva. Er abat Oliba n’ei er impulsor e era sua òbra exemplifique era foncion estructuradora e constructora dera Glèisa.

Ath long deth sègle XII s'assoliden quauqui uns des trèits que caracterizen era identitat catalana. Era aparicion deth coronim Catalonha ei quasi simultània ar inici der usatge deth catalan coma lengua escrita. ‘Es quate barres’, era ensenha des comdes de Barcelona e actuau bandèra nacionau, s’utilize dempús de finaus deth sègle XI.

Era societat feudau, mercadament agrària, se dinamize mercés ara intensificacion deth comèrç: apareishen naues viles, mercats e hèires, qu'estructuren eth territòri, e s’establissen granes rotes maritimes qu'òbren eth país ar escambi. Barcelona ei eth nuclèu urban mès poblat e eth centre politic, economic e sociau de Catalonha: n’ei capdau.

Era Corona d’Aragon nèish er an 1137 frut deth matrimòni de Ramon Berenguer IV de Barcelona damb Peironèla d'Aragon, hilha deth rei Ramir II ‘eth monge’ e ven ua poténcia militar que s’espandís per tèrres musulmanes. Era conquèsta dera Catalonha Naua genère un important corrent migratori de cap ath sud, en quau es ordes religiosi e militars i auràn ua grana influéncia.

Es ligams culturaus e politics damb Occitània mèrquen era personalitat dera Corona d'Aragon. Era cultura trobadoresca, tan caracteristica dera epòca, ei plan presenta ena cort. Era expansion de cap es tèrres occitanes se veirà troncada a causa dera crotzada francesa contra era eretgia càtara e era desbranda deth rei Pèir ‘eth catolic’ ena Batalha de Murèth, er an 1213.